امریکی حکومت نے صحافیوں کو روک کر سچ چھپانے کی کوشش کی: اسماعیل بقائی

ایرانی وزارتِ خارجہ کے ترجمان اسماعیل بقائی نے امریکی حکومت پر صحافیوں کی رسائی محدود کرنے اور حقائق چھپانے کے شدید الزامات عائد کیے ہیں۔ اپنے ایک بیان میں اسماعیل بقائی نے کہا کہ ایرانی صدر کی میڈیا ٹیم سمیت دیگر غیر ملکی صحافیوں کو وائٹ ہاؤس اور اہم تقاریب کی کوریج سے روکنا بنیادی آئینی و صحافتی حقوق کی کھلی خلاف ورزی ہے۔ انہوں نے موقف اختیار کیا کہ امریکی انتظامیہ معلومات تک آزادانہ رسائی میں رکاوٹیں کھڑی کر کے دراصل اپنے مخصوص پروپیگنڈے اور غلط معلومات کی مہم کو آگے بڑھا رہی ہے۔

ایرانی وزارتِ خارجہ کے ترجمان نے تہران میں صحافیوں سے گفتگو کرتے ہوئے امریکی پالیسیوں کو شدید تنقید کا نشانہ بنایا۔ انہوں نے کہا کہ جو ملک ماضی میں خود کو آزادیٔ صحافت کا سب سے بڑا علمبردار سمجھتا تھا اور دوسروں پر ‘آہنی پردہ’ گرانے کا الزام لگاتا تھا، آج وہ خود اسی آہنی پردے کے پیچھے چھپ کر کھڑا ہو گیا ہے۔ اسماعیل بقائی کے مطابق میڈیا پر یہ پابندیاں امریکی انتظامیہ کے اس دوہرے معیار کو بے نقاب کرتی ہیں جو وہ آزادیٔ اظہارِ رائے کے حوالے سے دنیا بھر میں قائم کرنے کا دعویٰ کرتی ہے۔