واشنگٹن کو اسرائیلی دباؤ کی زنجیروں سے آزاد ہونا چاہیے: عباس عراقچی

ایرانی وزیر خارجہ عباس عراقچی نے الزام عائد کیا ہے کہ امریکی پالیسی سازوں پر اسرائیلی لابی کا اثر و رسوخ اور دباؤ مسلسل بڑھ رہا ہے۔ اپنے سوشل میڈیا پلیٹ فارم ایکس (سابقہ ٹوئٹر) پر جاری ایک بیان میں عباس عراقچی نے دعویٰ کیا کہ اسرائیلی لابی امریکا پر مسلسل زور دے رہی ہے کہ وہ ایران سے متعلق اپنی تمام تر سفارتی و سیاسی پالیسیوں میں امریکی مفادات کے بجائے اسرائیلی مفادات کو اولیت اور ترجیح دے۔

ایرانی وزیر خارجہ نے اپنے بیان میں زور دیتے ہوئے کہا کہ اب وہ وقت آ گیا ہے کہ امریکی پالیسیوں کو اسرائیلی دباؤ اور اثر و رسوخ سے مکمل آزاد کرایا جائے۔ انہوں نے مزید کہا کہ اسرائیل کی جانب سے ایسا ماحول بنایا جا رہا ہے جس میں اسرائیل کے خلاف اٹھنے والے کسی بھی اقدام کی قیمت امریکا سے وصول کرنے کی بات کی جاتی ہے۔ عباس عراقچی نے واشنگٹن پر زور دیا کہ وہ اپنے قومی مفادات کے تحفظ کے لیے اسرائیلی دباؤ کی زنجیروں سے خود کو آزاد کرائے۔