ایران نے امریکہ کو اپنی شرائط پر مذاکرات کی ٹیبل پر آنے پر مجبور کیا، ابراہیم عزیزی

ایران نے امریکہ کو مکمل طور پر اپنی شرائط پر مذاکرات کی میز پر آنے پر مجبور کر دیا ہے، یکطرفہ فیصلے مسلط کرنے کا دور اب ہمیشہ کے لیے ختم ہو چکا ہے۔

ایرانی پارلیمنٹ کی قومی سلامتی کمیٹی کے سربراہ ابراہیم عزیزی نے عوامی رابطے کی ویب سائٹ ایکس (سابقہ ٹویٹر) پر جاری اپنے ایک اہم تزویراتی بیان میں واشگاف الفاظ میں کہا کہ اب دنیا میں ایران کے خلاف یکطرفہ فیصلے مسلط کرنے کا دور ہمیشہ کے لیے ختم ہو چکا ہے۔

ابراہیم عزیزی نے خطے کی صورتحال پر بات کرتے ہوئے واضح کیا کہ امریکہ کو ہر صورت لبنان کے خلاف جاری جنگ کے فوری خاتمے کا وعدہ پورا کرنا ہوگا اور دونوں ممالک کے مابین طے پانے والی حالیہ مفاہمتی یادداشت (ایم او یو) کے تمام نکات پر من و عن عملدرآمد یقینی بنانا ہوگا۔ انہوں نے سخت لہجہ اختیار کرتے ہوئے انتباہ جاری کیا کہ اگر امریکہ یا اس کے اتحادیوں کی طرف سے اس معاہدے کی کسی بھی قسم کی کوئی خلاف ورزی کی گئی، تو ایران کی طرف سے اس کا انتہائی سخت اور منہ توڑ جواب دیا جائے گا۔