ایران نے لبنان سے اسرائیلی انخلا کی واضح ٹائم لائن مانگ لی

ایرانی وزارتِ خارجہ کے ترجمان اسماعیل بقائی نے صحافیوں سے گفتگو کرتے ہوئے مطالبہ کیا ہے کہ مقبوضہ لبنانی علاقوں سے غیر مشروط اسرائیلی انخلا کے لیے ایک واضح اور حتمی ٹائم لائن طے کی جائے۔

اسماعیل بقائی نے کہا کہ لبنان کی خودمختاری کا تحفظ اور جنگ کا فوری خاتمہ ہی کسی بھی پائیدار معاہدے کی بنیادی شرط ہے۔ انہوں نے واضح کیا کہ اس معاملے پر ایران کا موقف اقوام متحدہ کے منشور اور عالمی قوانین کے بنیادی اصولوں پر مبنی ہے۔ ان کا مزید کہنا تھا کہ امریکا لبنان میں اسرائیلی جارحانہ کارروائیاں رکوانے کے لیے عملی اور مؤثر اقدامات کرے۔ ترجمان نے زور دے کر کہا کہ مفاہمتی یادداشت پر کامیاب عملدرآمد اور کسی بھی امن معاہدے کے دیرپا ہونے کے لیے لبنانی زمین پر اسرائیلی قبضے کا مکمل خاتمہ ناگزیر ہے۔