بحری ناکہ بندی ختم ہونے کے بعد ایران 5 کروڑ بیرل خام تیل برآمد کر چکا، ٹینکرز ٹریکرز

تیل کے ٹینکرز کی عالمی نقل و حرکت پر نظر رکھنے والے معتبر ادارے ‘ٹینکرز ٹریکرز’ (TankerTrackers) نے انکشاف کیا ہے کہ امریکہ کی جانب سے ایرانی توانائی کی برآمدات پر عائد بحری ناکہ بندی ختم کیے جانے کے بعد سے ایران اب تک 5 کروڑ بیرل خام تیل برآمد کر چکا ہے۔

ادارے کی جانب سے سوشل میڈیا پلیٹ فارم ‘ایکس’ (سابقہ ٹوئٹر) پر جاری کردہ ایک بیان میں بتایا گیا ہے کہ جون 2026ء کے دوران ایران کی یومیہ خام تیل کی برآمدات اوسطاً 16 لاکھ 60 ہزار (1.66 ملین) بیرل رہیں۔ رپورٹ کے مطابق، جہاں مشرقِ وسطیٰ کے بیشتر دیگر ممالک کی تیل برآمدات اب بھی جنگ سے پہلے کی سطح سے کم ہیں، وہی ایران نے اپنی برآمدات میں غیر معمولی اور نمایاں اضافہ ریکارڈ کیا ہے۔

رپورٹ میں واضح کیا گیا ہے کہ ایران پر عائد امریکی بحری ناکہ بندی 17 جون کو امریکہ اور ایران کے درمیان دستخط ہونے والی ایک حالیہ مفاہمتی یادداشت (MoU) کے تحت ختم کی گئی تھی۔ اس سفارتی پیشرفت کے بعد امریکی محکمہ خزانہ نے ایک 60 روزہ خصوصی اجازت نامہ جاری کیا، جس کے تحت ایران کو 21 اگست تک خام تیل کی پیداوار بڑھانے اور اسے عالمی مارکیٹ میں کھلے عام فروخت کرنے کی قانونی اجازت دی گئی ہے۔