معاہدے کی خلاف ورزی پر ایران نے دوبارہ آبنائے ہرمز کو مکمل طور پر بند کردیا

تہران: لبنان پر اسرائیل کے مسلسل فضائی و زمینی حملوں اور امریکا کی جانب سے مبینہ وعدہ خلافی کے بعد ایران نے دنیا کی اہم ترین بحری گزرگاہ ‘آبنائے ہرمز’ (Strait of Hormuz) کو ہر قسم کی آمدورفت کے لیے مکمل طور پر بند کرنے کا بڑا اعلان کر دیا ہے۔ ایرانی سرکاری ٹی وی پر نشر ہونے والے ایک ہنگامی بیان میں خاتم الانبیاء سینٹرل ہیڈکوارٹر کے ترجمان نے واضح کیا کہ امریکا مفاہمتی یادداشت کے تحت جنگ بندی سے متعلق اپنی ذمہ داریاں پوری کرنے میں بری طرح ناکام رہا ہے، اس لیے آبنائے ہرمز کو فوری طور پر بند کیا جا رہا ہے اور یہ دشمن کی وعدہ خلافی کا پہلا جواب ہے۔ انہوں نے متنبہ کیا کہ اگر اسرائیل کی جانب سے جنوبی لبنان میں جاری جارحیت نہ رکی تو مزید سخت اقدامات کیے جائیں گے۔

دوسری جانب، ایرانی پاسدارانِ انقلاب (IRGC) نے بھی اپنے علیحدہ عسکری بیان میں تصدیق کی ہے کہ ہفتے کی صبح سے آبنائے ہرمز کو مکمل سیل کر دیا گیا ہے۔ ایرانی خبر رساں ادارے ‘فارس’ کے مطابق، پاسدارانِ انقلاب نے تمام تجارتی، مال بردار اور بالخصوص تیل بردار (Oil Tankers) بحری جہازوں کو سختی سے خبردار کیا ہے کہ وہ آبنائے ہرمز کے قریب آنے سے مکمل گریز کریں، بصورتِ دیگر کسی بھی قسم کے نقصان کی ذمہ داری ان پر ہوگی۔ ایرانی حکام نے یہ واضح نہیں کیا کہ یہ بندش کتنے عرصے تک برقرار رہے گی، تاہم ایرانی وفد امریکا کے ساتھ طے شدہ مذاکرات کے لیے سوئٹزرلینڈ روانہ ہو چکا ہے جہاں امریکی صدر ڈونلڈ ٹرمپ کے مشیر جیرڈ کشنر اور خصوصی ایلچی اسٹیو وٹکوف پہلے سے موجود ہیں۔ واضح رہے کہ بدھ کے روز امریکا، ایران اور پاکستان کے مابین مفاہمتی یادداشت پر دستخط کے بعد اس شاہراہ کو کھولا گیا تھا، جس سے عالمی منڈی میں تیل کی قیمتیں نیچے آئی تھیں، مگر حالیہ کشیدگی سے دوبارہ عالمی معیشت پر دباؤ کا خطرہ پیدا ہو گیا ہے۔