ایران اور چین نے جنوبی افریقہ کے سفارتی تعلقات پر امریکی تنقید مسترد کر دی

ایران اور چین نے جنوبی افریقہ کے ساتھ اپنے سفارتی تعلقات پر امریکی سفارت خانے کی جانب سے کی جانے والی تنقید کو یکسر مسترد کرتے ہوئے واشنگٹن کو سخت جواب دیا ہے۔

یہ تنازع اس وقت کھڑا ہوا جب جنوبی افریقہ میں متعین امریکی سفارت خانے نے سماجی رابطے کی ویب سائٹ ‘ایکس’ پر ایک پوسٹ شیئر کی، جس میں پریٹوریا پر ایرانی وزیر کے لیے سرخ قالین بچھانے اور بیجنگ کے ساتھ قریبی تعلقات استوار کرنے کی خواہش پر اعتراض کیا گیا۔ امریکی سفارت خانے نے اپنی پوسٹ میں لکھا کہ “جنوبی افریقہ کے عوام کو دیکھنا چاہیے کہ ان کی حکومت (عالمی سطح پر) کس کے ساتھ کھڑے ہونے کا انتخاب کر رہی ہے۔”

امریکی تنقید کا فوری جواب دیتے ہوئے جنوبی افریقہ میں متعین چین کے سفیر ‘وو پینگ’ نے کہا کہ بیجنگ جنوبی افریقہ اور دنیا کے دیگر ممالک کے مابین قائم تعلقات پر کوئی تبصرہ نہیں کرتا اور وہ دیگر ممالک سے بھی اسی طرح کے احترام اور سفارتی شائستگی کی توقع رکھتا ہے۔

دوسری جانب، جنوبی افریقہ میں قائم ایرانی سفارت خانے نے بھی چینی سفیر کے اس موقف کی بھرپور تائید کی۔ ایرانی سفارت خانے نے چینی سفیر کے بیان پر ردعمل دیتے ہوئے لکھا “ویل سیڈ” (درست کہا)، اور واضح کیا کہ خود مختار ممالک کے باہمی تعلقات میں کسی تیسرے ملک کی مداخلت ناقابلِ قبول ہے۔