ایران کے ساتھ لڑائی ٹرمپ کیلئے ناقابل فراموش سبق ہوگا، ایرانی چیف آف سٹاف

تہران: ایران کے چیف آف اسٹاف میجر جنرل عبدالرحیم موسوی نے خبردار کیا ہے کہ ایران کے ساتھ کسی بھی قسم کی لڑائی امریکی صدر ڈونلڈ ٹرمپ کے لیے ناقابلِ فراموش سبق ثابت ہوگی۔

اپنے بیان میں میجر جنرل موسوی نے کہا کہ امریکی صدر کے غیر محتاط بیانات کسی بھی سربراہِ مملکت کے شایانِ شان نہیں۔ انہوں نے سوال اٹھایا کہ اگر ٹرمپ جنگ کا ارادہ رکھتے ہیں تو پھر مذاکرات کی بات کیوں کی جا رہی ہے۔

انہوں نے مزید کہا کہ ایران اپنی خودمختاری اور دفاعی صلاحیتوں کے تحفظ کے لیے ہر ممکن اقدام کرے گا اور کسی بھی دباؤ کو قبول نہیں کرے گا۔

واضح رہے کہ ایران اور امریکا کے درمیان جوہری پروگرام سے متعلق بالواسطہ مذاکرات کا دوسرا دور عمان کی سربراہی میں منگل سے جنیوا میں شروع ہونے جا رہا ہے۔ ایرانی وزیر خارجہ سفارتی اور تکنیکی وفد کے ہمراہ سوئٹزرلینڈ روانہ ہو چکے ہیں۔

دوسری جانب ٹرمپ انتظامیہ کی جانب سے ایران پر دباؤ بڑھانے کا سلسلہ بھی جاری ہے۔ حالیہ بیان میں امریکی وزیر خارجہ نے کہا تھا کہ ایران کے ساتھ آج تک کوئی مکمل طور پر کامیاب معاہدہ نہیں ہو سکا، تاہم امریکا ایک کامیاب ڈیل کی کوشش کر رہا ہے اور اگر مذاکرات ناکام ہوئے تو قانون کے مطابق اقدام کیا جائے گا