محسن نقوی کی تہران میں سکندر مومنی سے ملاقات، سکیورٹی سمیت مختلف امور پر تبادلہ خیال

وفاقی وزیرِ داخلہ محسن نقوی اہم سرکاری دورے پر ایران پہنچ گئے ہیں، جہاں تہران ایئرپورٹ پر ان کے ایرانی ہم منصب سکندر مومنی نے ان کا پرجوش استقبال کیا۔ دورے کے دوران دونوں وزرائے داخلہ کے درمیان اعلیٰ سطحی ملاقات ہوئی جس میں پاک ایران دوطرفہ تعلقات، بارڈر مینجمنٹ اور خطے کی تازہ ترین سیکورٹی صورتحال پر تفصیلی تبادلۂ خیال کیا گیا۔ ذرائع کے مطابق ملاقات میں دونوں ممالک کے درمیان طے پانے والے مختلف دوطرفہ معاہدوں اور سیکیورٹی تعاون میں پیشرفت کا جائزہ لیا گیا۔

ملاقات کے دوران ایرانی وزیرِ داخلہ سکندر مومنی نے علاقائی امن و استحکام کے لیے پاکستان کی مسلسل کوششوں کا خیرمقدم کیا اور وزیراعظم پاکستان اور فیلڈ مارشل کی کاوشوں پر ان کا شکریہ ادا کیا۔ سکندر مومنی کا کہنا تھا کہ خطے میں تناؤ کے خاتمے کے لیے پاکستان کا کردار قابلِ تحسین ہے اور ان کا حالیہ دورۂ پاکستان انتہائی مفید ثابت ہوا۔ اس موقع پر وفاقی وزیرِ داخلہ محسن نقوی نے عزم ظاہر کیا کہ آنے والے وقت میں اسلام آباد اور تہران کے درمیان دوطرفہ سفارتی و سیکورٹی تعلقات مزید مستحکم ہوں گے۔