انڈونیشیا کے صدر پرابووو سبیانتو آج دو روزہ دورے پر پاکستان پہنچیں گے

انڈونیشیا کے صدر پرابووو سبیانتو کل دو روزہ سرکاری دورے پر اسلام آباد پہنچیں گے۔ دفترِ خارجہ کے مطابق صدر پرابووو پاکستان کے پہلے سرکاری دورے پر آ رہے ہیں، جس کی دعوت وزیراعظم شہباز شریف نے دی تھی۔ دورہ ایسے موقع پر ہو رہا ہے جب پاکستان اور انڈونیشیا اپنے سفارتی تعلقات کے 75 سال مکمل کر رہے ہیں۔

ترجمان کے مطابق انڈونیشی صدر کے ہمراہ اہم وزراء اور سینئر حکام پر مشتمل اعلیٰ سطح کا وفد بھی ہوگا۔ دورے کے دوران صدر پرابووو، صدرِ پاکستان آصف علی زرداری، وزیراعظم شہباز شریف اور چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر سے ملاقاتیں کریں گے۔

انڈونیشیا کا آخری صدارتی دورہ 2018 میں صدر جوکو ویدوڈو نے کیا تھا۔ موجودہ دورے میں تجارت، سرمایہ کاری، دفاع، صحت، آئی ٹی، موسمیاتی تبدیلی، تعلیم اور ثقافت سمیت مختلف شعبوں میں دوطرفہ تعاون بڑھانے پر مشاورت ہوگی۔ متعدد اہم معاہدوں اور مفاہمت کی یادداشتوں پر دستخط بھی متوقع ہیں۔