پاک بھارت جنگ: چین کا پہلی بار جے 10 سی طیارے کی کامیابی کا اعلان

چین نے پہلی بار سرکاری سطح پر جے-10 سی ای جنگی طیارے کی عملی جنگی کامیابی کا اعلان کر دیا ہے، جس نے مئی 2025 میں ہونے والی فضائی جھڑپوں کے دوران مؤثر کارکردگی کا مظاہرہ کیا۔

پاکستان کی مسلح افواج نے مئی کی جھڑپوں کے بعد رفال سمیت انڈیا کے متعدد طیارے مار گرانے کا اعلان کیا تھا، جبکہ بعد ازاں وزیر اعظم شہباز شریف اور امریکی صدر ڈونلڈ ٹرمپ بھی سات سے آٹھ طیاروں کے نقصان کا ذکر کر چکے ہیں۔ انڈین فوجی قیادت نے بھی طیاروں کے نقصان کا اعتراف کیا تھا تاہم تعداد ظاہر نہیں کی گئی۔

چین کے مطابق جے-10 سی ای ایک مکمل طور پر مقامی سطح پر تیار کردہ ملٹی رول جنگی طیارہ ہے، جس کی اس کامیابی نے نہ صرف عالمی دفاعی ماہرین بلکہ بین الاقوامی ہوابازی صنعت کی توجہ بھی اپنی جانب مبذول کرا لی ہے۔

چینی حکام کا کہنا ہے کہ یہ پیش رفت چینی دفاعی مصنوعات کی عالمی منڈیوں میں ساکھ اور برآمدی امکانات کو مزید مضبوط کرے گی۔