بھارتی پولیس اہلکار کے پاس برصغیر کی تاریخ کی عکاسی کرتا قدیم سکوں کا ذخیرہ

حیدرآباد/تروپتی: بھارتی ریاست آندھرا پردیش میں تعینات ایک پولیس ہیڈ کانسٹیبل تھماپورم سریش ریڈی نے دو دہائیوں کی کاوشوں کے بعد قدیم سکوں اور نایاب ڈاک ٹکٹوں کا ایسا ذخیرہ جمع کر لیا ہے جو برصغیر کی ہزاروں سالہ سیاسی، ثقافتی اور معاشی تاریخ کی عکاسی کرتا ہے۔

’انڈین ایکسپریس‘ کی رپورٹ کے مطابق، 1998ء میں پولیس فورس میں شمولیت اختیار کرنے والے سریش ریڈی کے پاس موریہ، ساتواہنا، مغل سلطنت اور برطانوی دورِ حکومت کے سونے، چاندی اور تانبے کے نایاب سکے موجود ہیں۔ انہوں نے ان سکوں کی تاریخی توثیق کے لیے باقاعدہ کتب خانوں سے تحقیق اور مطالعہ کیا۔ سریش ریڈی کے مطابق اپنے بیٹے کی شدید بیمار پرسی اور گھریلو ذہنی دباؤ کے دوران سکے جمع کرنا اور ان کی تاریخ کا مطالعہ کرنا ان کے لیے روحانی اور ذہنی سکون کا ذریعہ بنا۔

سریش ریڈی کا کہنا ہے کہ ان کے نزدیک سکوں کی حقیقی اہمیت ان کی مالی قیمت سے زیادہ ان میں پوشیدہ تاریخی پس منظر کی ہے۔ انہوں نے خواہش ظاہر کی ہے کہ اس تاریخی ذخیرے کو الماریوں تک محدود رکھنے کے بجائے تعلیمی اداروں اور عوامی نمائشوں کا حصہ بنایا جائے تاکہ نئی نسل کمپیوٹر سکرینوں سے ہٹ کر تاریخ کو حقیقی نوادرات کی شکل میں دیکھ اور سمجھ سکے۔