مودی حکومت مسلمان مخالف ایجنڈے پر قائم، مساجد اور مزارات مسمار

بھارت میں ہندوتوا کے نفرت انگیز نظریے کے غلبے اور برسراقتدار بی جے پی حکومت کی سرپرستی میں اقلیتوں بالخصوص مسلمانوں کا بدترین استحصال اور ان کے بنیادی حقوق کی پامالی کا سلسلہ شدت اختیار کر گیا ہے، جہاں مسلمانوں پر تشدد اور ان کی عبادت گاہوں کی مسماری معمول بن چکی ہے۔

میڈیا رپورٹ ‘ہندوستان گزٹ’ کے مطابق، مودی حکومت کے زیرِ اقتدار بھارتی ریاست گجرات کے ضلع کچھ میں چند روز کے دوران متعصبانہ کارروائی کرتے ہوئے 3 تاریخی مساجد اور متعدد مزارات کو مسمار کر دیا گیا ہے۔ مقامی رہائشیوں اور مسلم کمیونٹی کے مطابق، انتظامیہ کی جانب سے اس بڑی کارروائی سے قبل کوئی پیشگی قانونی نوٹس بھی جاری نہیں کیا گیا تھا۔

بھارتی جریدے کی رپورٹ میں انکشاف کیا گیا ہے کہ مساجد اور مزارات کی غیر قانونی مسماری پر جب مقامی مسلمانوں نے انتظامیہ سے وضاحت طلب کی تو انہیں سنگین نتائج کی دھمکیاں دی گئیں۔ اس وحشیانہ کارروائی اور مذہبی مقامات کی بے حرمتی کے خلاف پرامن احتجاج کرنے والے 25 مسلمان نوجوانوں کو پولیس نے فوری طور پر گرفتار کر کے جیل منتقل کر دیا۔انسانی حقوق کے معتبر بین الاقوامی ادارے ‘ہیومن رائٹس واچ’ (HRW) نے اس صورتحال پر گہری تشویش کا اظہار کرتے ہوئے کہا ہے کہ بھارت میں اقلیتوں، خصوصاً مسلمانوں کے ساتھ منظم امتیازی سلوک روا رکھنے کے لیے بی جے پی حکومتی مشینری کو بے دریغ استعمال کر رہی ہے۔

رپورٹ میں مزید کہا گیا ہے کہ ہندوتوا ایجنڈے پر کاربند مودی حکومت اقلیتوں کی شناخت، ان کی تاریخ اور پاکیزہ عبادت گاہوں پر مسلسل حملے کر کے بھارت سے ان کا وجود ختم کرنے کے درپے ہے، جو عالمی قوانین کی کھلی خلاف ورزی ہے۔