آئی ایم ایف کا جی ایس ٹی 18 فیصد سے بڑھا کر 19 فیصد کرنے کا مطالبہ

اسلام آباد: پاکستان اور عالمی مالیاتی ادارے آئی ایم ایف کے درمیان آئندہ مالی سال کے بجٹ سے متعلق ورچوئل مذاکرات حتمی مرحلے میں داخل ہو گئے ہیں۔

ذرائع کے مطابق آئی ایم ایف نے مطالبہ کیا ہے کہ جنرل سیلز ٹیکس کی شرح 18 فیصد سے بڑھا کر 19 فیصد کی جائے تاکہ ریونیو میں اضافہ یقینی بنایا جا سکے۔

مجوزہ بجٹ کا حجم 15.1 ٹریلین روپے سے بڑھا کر 15.5 ٹریلین روپے تک رکھنے کی تجویز زیر غور ہے۔

رپورٹس کے مطابق رواں مالی سال کا ٹیکس ہدف کم کر کے 13 ہزار 5 ارب روپے مقرر کرنے کی تجویز دی گئی ہے تاہم آئی ایم ایف کی جانب سے مجموعی ٹیکس ہدف 15 ہزار ارب روپے سے زائد رکھنے پر اصرار کیا جا رہا ہے۔

آئندہ بجٹ میں 220 ارب روپے کے نئے ٹیکس اقدامات شامل کیے جانے کا امکان ہے۔

مزید تجاویز میں تاجروں کے لیے فکسڈ ٹیکس اسکیم متعارف کرانے اور سالانہ 20 کروڑ روپے سیلز پر 25 ہزار روپے فکسڈ ٹیکس عائد کرنے کی تجویز شامل ہے، جبکہ فکسڈ ٹیکس ادا کرنے والوں کو آڈٹ سے استثنیٰ دینے پر بھی غور کیا جا رہا ہے۔

بجٹ میں سپر ٹیکس میں ایک سے دو فیصد کمی اور تنخواہ دار طبقے کے لیے ٹیکس سلیبز میں ردوبدل کی تجاویز بھی زیر غور ہیں، تاہم تنخواہ دار طبقے کو ریلیف دینے کا فیصلہ آئی ایم ایف مشاورت اور کابینہ کی منظوری سے مشروط ہوگا۔

حکام کے مطابق بجٹ میں ٹیکس اصلاحات اور ریونیو میں اضافے پر خصوصی توجہ مرکوز ہے۔