گیس سیکٹر کے گردشی قرضے پر آئی ایم ایف کی نئی شرائط

پاکستان میں گیس سیکٹر کے تقریباً 3 ہزار 300 ارب روپے تک پہنچے والے مجموعی گردشی قرضے کی سیٹلمنٹ کے لیے عالمی مالیاتی فنڈ (آئی ایم ایف) نے نئی شرائط پیش کر دی ہیں۔ ذرائع کے مطابق آئی ایم ایف نے مطالبہ کیا ہے کہ دونوں سرکاری گیس کمپنیوں کے تمام نا قابلِ وصول مطالبات اور نقصانات کو باضابطہ طور پر اکاؤنٹس میں بْک کیا جائے اور اس کے بعد کمپنیوں کی مالی پوزیشن بہتر بنانے کے لیے انہیں ‘ری کیپٹلائز’ کیا جائے۔ دوسری جانب پٹرولیم ڈویژن کے حکام اس شرط کو ماننے میں ہچکچاہٹ کا شکار ہیں کیونکہ اس سے کمپنیوں کے شیئرز کی مالیت کم ہونے کا اندیشہ ہے۔ 1,700 ارب روپے کے مجوزہ سیٹلمنٹ پلان پر حالیہ ورچوئل مذاکرات میں حتمی اتفاق نہیں ہو سکا ہے، جس کے بعد اب اس اہم معاملے پر ستمبر میں دوبارہ بات چیت کی جائے گی۔