آئی ایم ایف نے پاکستان کیلئے 1.3 ارب ڈالر کی قسط منظور کرلی

واشنگٹن میں آئی ایم ایف کے ایگزیکٹیو بورڈ کے اجلاس میں پاکستان کے لیے تقریباً 1.3 ارب ڈالر کی نئی قسط کی منظوری دے دی گئی۔ ذرائع کے مطابق یہ رقم 7 ارب ڈالر کے ایکسٹینڈڈ فنڈ فیسلٹی (EFF) پروگرام کے تحت ہے، جس میں سے ایک ارب ڈالر سے زائد پاکستان کو ملیں گے۔
اس کے ساتھ ساتھ آر ایس ایف (RSF) کے تحت بھی 20 کروڑ ڈالر سے زائد کی پہلی قسط شامل ہے، جس کے بعد دونوں قرض پروگراموں کے تحت پاکستان کو ملنے والی مجموعی رقم 3.3 ارب ڈالر تک پہنچ جائے گی۔
آئی ایم ایف کے مطابق پاکستان کو ای ایف ایف پروگرام کے تحت دو اقساط پہلے ہی جاری کی جا چکی ہیں جبکہ ایگزیکٹیو بورڈ نے دوسرے اقتصادی جائزے کی بھی باقاعدہ منظوری دے دی ہے۔
آئی ایم ایف نے جاری پروگرام پر حکومتی عملدرآمد کو مضبوط اور تسلی بخش قرار دیا ہے اور معاشی اصلاحات کے تسلسل کو اہم قرار دیتے ہوئے پاکستان کی جانب سے مزید اقدامات کی یقین دہانی کرائی گئی ہے۔
حکام کا کہنا ہے کہ نئی قسط کے اجرا سے پاکستان کے زرمبادلہ کے ذخائر میں اضافہ ہوگا اور ادائیگیوں کے توازن پر مثبت اثر پڑے گا۔