اسلام آباد: جعلی ڈگری پر سرکاری نوکری کرنیوالا گریڈ 19 کا افسر برطرف، تمام مراعات واپس کرنے کا حکم

اسلام آباد ہائی کورٹ کے ڈویژنل بینچ نے جعلی ڈگری کی بنیاد پر سرکاری ملازمت حاصل کرنے والے گریڈ 19 کے افسر وسیم افضل وڑائچ کی انٹرا کورٹ اپیل خارج کرتے ہوئے انہیں نوکری سے برطرف کرنے کا فیصلہ برقرار رکھا ہے۔ یکم جولائی 2026 کو جاری ہونے والے عدالتی فیصلے کے مطابق، وسیم افضل وڑائچ کو فراڈ اور جعلسازی کا مرتکب قرار دیا گیا ہے اور یہ واضح کیا گیا ہے کہ ان کی بی اے اور ایم بی اے کی اسناد دھوکہ دہی سے حاصل کی گئی تھیں۔ عدالت نے ملزم کو ملازمت کے دوران وصول کردہ تمام مراعات اور تنخواہیں واپس کرنے کا حکم دیتے ہوئے ایف آئی اے (FIA) کو ان کے خلاف فوری قانونی کارروائی کی ہدایت کی ہے۔ ریکارڈ کے مطابق، وسیم افضل نے 1993 میں جعلی ڈگری پر ایس ایم ای (SME) بینک میں نوکری حاصل کی تھی اور 2009 میں گولڈن ہینڈ شیک لے کر الگ ہو گئے، جس کے بعد انہوں نے 2011 میں اسی جعلی بنیاد پر وزارتِ محنت و افرادی قوت میں گریڈ 19 کی اسامی حاصل کی۔

عدالتِ عالیہ کے اس فیصلے کی روشنی میں وزارتِ اوورسیز پاکستانیز نے وسیم افضل کی برطرفی اور مراعات کی واپسی کا باقاعدہ نوٹیفکیشن جاری کر کے ایف آئی اے کو فوجداری کارروائی کے لیے لکھ دیا ہے