آئی ایف ایف سی او کا پاکستان میں مزید سرمایہ کاری اور کاروبار وسعت دینے کا عزم

وفاقی وزیرِ خزانہ محمد اورنگزیب سے آئی ایف ایف سی او (IFFCO) گروپ کے وفد نے اسلام آباد میں اہم ملاقات کی، جس کے دوران وفد نے پاکستان میں اپنے کاروباری عملیات کو وسعت دینے اور مزید سرمایہ کاری کرنے کے پختہ عزم کا اظہار کیا۔ ملاقات میں گروپ کی جانب سے عبدالغنی عبداللہ نے بتایا کہ آئی ایف ایف سی او 2006 سے پاکستان میں فعال ہے اور اب تک تقریباً 100 ملین ڈالر کی سرمایہ کاری کر چکا ہے۔ گروپ نے ملک میں 2 ریفائنریز اور 5 مینوفیکچرنگ سائٹس قائم کرنے کے علاوہ بیج کرشنگ، اینیمل نیوٹریشن اور فیڈ ملز کے شعبوں میں بھی کاروبار کو وسعت دی ہے۔ انہوں نے پاکستان کو گروپ کے لیے ایک کلیدی مارکیٹ قرار دیتے ہوئے فوڈ اور مینوفیکچرنگ سیکٹر میں سرمایہ کاری کے وسیع مواقع کی نشاندہی کی۔

وزیرِ خزانہ محمد اورنگزیب نے آئی ایف ایف سی او کی جانب سے مزید سرمایہ کاری کی پیشکش کا خیرمقدم کرتے ہوئے کہا کہ حکومت ملک میں موجودہ سرمایہ کاروں کو آسانیاں اور سہولیات فراہم کرنے پر خصوصی توجہ دے رہی ہے۔ انہوں نے واضح کیا کہ صنعتی ترقی، مقامی ویلیو ایڈیشن اور روزگار کے مواقع پیدا کرنا حکومت کی اولین ترجیحات میں شامل ہیں اور اس مقصد کے لیے سازگار ایکو سسٹم تشکیل دیا جا رہا ہے۔ وزیرِ خزانہ نے پاکستان اور متحدہ عرب امارات (UAE) کے درمیان اقتصادی و تجارتی روابط کو مزید مضبوط بنانے کے عزم کا اعادہ کیا اور اس سلسلے میں یو اے ای کی سفارتکاری کے مثبت کردار کو سراہا۔