حیدرآباد: کینٹ قبرستان کے قریب ڈکیتوں سے مبینہ پولیس مقابلہ، 2 مسلح ڈاکو ہلاک

حیدرآباد میں کینٹ قبرستان کے قریب مکی شاہ پولیس اور بین الصوبائی ڈکیت گروہ کے درمیان شدید فائرنگ کا تبادلہ ہوا ہے، جس کے نتیجے میں گروہ کے 2 مسلح ڈاکو ہلاک ہو گئے ہیں۔ ایس ایس پی حیدرآباد کے مطابق، ابتدائی معلومات سے پتہ چلا ہے کہ ہلاک ہونے والے ملزمان گھریلو خواتین اور بالخصوص لیڈی ڈاکٹرز کو نشانہ بنانے کی سنگین وارداتوں میں ملوث تھے اور گزشتہ ڈیڑھ سال کے دوران 35 سے زائد ڈکیتیوں کی وارداتیں کر چکے تھے۔ انسپکٹر جنرل آف پولیس (آئی جی) سندھ جاوید عالم اوڈھو نے حیدرآباد پولیس کی اس شاندار اور کامیاب کارروائی پر ایس پی حیدرآباد اور پوری پولیس ٹیم کو شاباش دی ہے۔ آئی جی سندھ نے پولیس حکام کو ہدایت جاری کی ہے کہ ہلاک ملزمان کے جرائم کا ڈیٹا حاصل کرنے کے لیے دوسرے صوبوں کے قانون نافذ کرنے والے اداروں سے رابطہ کیا جائے، تاکہ اس بین الصوبائی جرائم کے نیٹ ورک کو مکمل طور پر بے نقاب کر کے ان کے دیگر سہولت کاروں کو بھی قانون کے کٹہرے میں لایا جا سکے۔