حوثیوں کا یمنی علاقے ذباب اور سٹرٹیجک جزیرے میون پر بھی قبضہ

یمن میں شدت اختیار کرتی خانہ جنگی کے دوران حوثی باغیوں نے حکمتِ عملی کے لحاظ سے انتہائی اہم باب المندب کی قریبی ساحلی پٹی ’ذباب‘ اور سٹریٹجک جزیرے ’میون‘ پر مکمل کنٹرول حاصل کر لیا ہے۔ یمنی سرکاری ذرائع کے مطابق حکومتی فورسز شدید لڑائی کے بعد باب المندب کے اس اہم جزیرے سے پسپا ہو گئی ہیں۔ ایرانی سرکاری خبر ایجنسی کے مطابق حوثیوں نے باب المندب کی نگرانی کرنے والے اہم فوجی مرکز ’العمری گیریژن‘ اور بحیرہ احمر کے جزیرے ’زقر‘ پر بھی قبضے کا دعویٰ کیا ہے، جس کا مقصد عالمی سمندری تجارتی راستے پر اپنی گرفت مضبوط کرنا ہے۔

حوثی رہنما محمد البخیتی کے جمعرات کو کیے گئے دعوے کے مطابق تعز کے بیشتر علاقوں اور فوجی اڈوں کا کنٹرول سنبھالنے کے بعد حوثی جنگجو المخا ایئرپورٹ تک پہنچ چکے ہیں۔ دوسری جانب، یمنی سرکاری فوج نے کارروائی کا آغاز کرتے ہوئے اعلان کیا ہے کہ یمنی فضائیہ نے پہلے سے مقرر کردہ ‘کل باکس’ (Kill Box) کے اندر فضائی بمباری شروع کر دی ہے۔ یمنی عسکری حکام نے عام شہریوں اور مسافروں کو تعز-المخا روڈ اور المخا-ذباب روڈ استعمال کرنے سے سخت گریز کرنے کی ہدایت کی ہے۔