حوثیوں کا بچوں کو زبردستی بھرتی کر کے جنگی محاذوں پر بھیجنے کا انکشاف

یمن کی سول سوسائٹی تنظیموں نے ایک مشترکہ بیان جاری کرتے ہوئے شدید تشویش ظاہر کی ہے کہ ایران کی حمایت یافتہ حوثی ملیشیا نے حالیہ عسکری کارروائیوں کے دوران بچوں کو جبری طور پر فوج میں بھرتی کر کے جنگی محاذوں پر بھیجا ہے۔ تنظیموں کے مطابق تعز، بحیرہ احمر کے مغربی ساحلی علاقوں، مارب اور الجوف کے محاذوں پر کم عمر بچوں کے مسلح تنازعات میں شامل ہونے اور گرفتاری کے متعدد مصدقہ واقعات سامنے آئے ہیں۔ حقوقِ انسانی کی تنظیموں نے یاد دہانی کرائی کہ بچوں کو عسکری مقاصد کے لیے استعمال کرنا بین الاقوامی قوانین کے تحت صریحاً جنگی جرم کے زمرے میں آتا ہے، جبکہ حوثیوں کی تازہ پیش قدمی میں شہری آبادیوں، گھروں، اسکولوں اور طبی مراکز کو بھی براہِ راست نشانہ بنایا گیا ہے۔

اقوامِ متحدہ کے ہائی کمشنر برائے انسانی حقوق وولکر ترک کے مطابق حوثیوں کی حالیہ جارحیت کے نتیجے میں یمن میں کم از کم 125 عام شہری ہلاک یا شدید زخمی ہو چکے ہیں، جبکہ 1 لاکھ 25 ہزار سے زائد افراد اپنا گھر بار چھوڑ کر بے گھر ہونے پر مجبور ہوئے ہیں۔ سول سوسائٹی کی تنظیموں نے خبردار کیا ہے کہ اس تازہ ترین جنگ اور کشیدگی کے باعث یمن کا پہلے سے موجود سنگین انسانی اور معاشی بحران مزید ہولناک شکل اختیار کر رہا ہے، جس کے لیے عالمی برادری کی فوری مداخلت ضروری ہے۔