عید پر گوشت کے حد سے زیادہ استعمال سے گریز کریں، ماہرینِ صحت

طبی ماہرین نے عیدالاضحیٰ کے موقع پر عوام کو خبردار کیا ہے کہ گوشت اور چٹ پٹے کھانوں کا زیادہ استعمال صحت کے مسائل پیدا کرسکتا ہے، اس لیے کھانے پینے میں اعتدال اختیار کیا جائے۔

ماہرینِ صحت کے مطابق عید کے بعد بدہضمی، معدے کی خرابی اور آنتوں کے امراض کے مریضوں میں نمایاں اضافہ سامنے آتا ہے، خصوصاً ایسے افراد زیادہ متاثر ہوتے ہیں جو غیرمتوازن خوراک استعمال کرتے ہیں۔

ماہرین کا کہنا ہے کہ اگر گوشت مناسب طریقے سے نہ پکایا جائے تو پیٹ کے مختلف امراض جنم لے سکتے ہیں جبکہ شدید گرمی میں زیادہ گوشت کھانا نظامِ ہاضمہ پر اضافی دباؤ ڈال دیتا ہے۔

انہوں نے دل، شوگر اور دیگر دائمی بیماریوں میں مبتلا افراد کو خاص طور پر محتاط رہنے کی ہدایت کرتے ہوئے کہا کہ پانی، پھل اور قدرتی غذاؤں کا استعمال بڑھایا جائے۔

ماہرین نے بہتر ہاضمے کے لیے ادرک اور گُڑ کے استعمال کو مفید قرار دیا ہے۔