صنعتی پالیسی آئی ایم ایف کی منظوری کے بعد، برآمدات اور چھوٹی صنعتوں کو فروغ،ہارون اختر

اسلام آباد: وزیر صنعت ہارون اختر نے کہا ہے کہ پاکستان کی صنعتی پالیسی آئی ایم ایف کی منظوری کے بعد عوام کے سامنے پیش کی جائے گی۔ انہوں نے بتایا کہ نیشنل ٹیرف پالیسی برآمدات کو بڑھانے میں مددگار ثابت ہوگی اور ملکی صنعتوں کی ترقی میں اہم کردار ادا کرے گی۔

ہارون اختر نے کہا کہ وزارت صنعت نے نیو انرجی وہیکل پالیسی تیار کی ہے، جبکہ جیمز اور موبائل فون کی پالیسیاں بھی جلد جاری کی جائیں گی۔ ملک میں ویکسین کی تیاری، سولر پینلز کی مینوفیکچرنگ اور گھریلو ضروریات کے آلات کی مقامی پیداوار پر توجہ دی جا رہی ہے۔

وزیر نے مزید کہا کہ چھوٹی صنعتیں معیشت کی ترقی میں ریڑھ کی ہڈی کی حیثیت رکھتی ہیں اور ان کو آسان اقساط پر قرض دینے کی پالیسی بھی بنائی جا رہی ہے۔ خواتین کو ملکی ترقی میں حصہ دلانے کے اقدامات بھی جاری ہیں، جس میں گلگت بلتستان کی خواتین نے نمائش میں 20 اسٹالز مانگے ہیں۔

ہارون اختر نے بتایا کہ سمیڈا کے حوالے سے وزیر اعظم خود خصوصی دلچسپی لے رہے ہیں اور ڈیڑھ سال سے اس کی قیادت کر رہے ہیں تاکہ صنعتی سرمایہ کاری اور ملکی معیشت کو فروغ دیا جا سکے۔