ترک وزیر خارجہ نے مکہ مشترکہ دفاعی معاہدہ پر بے جا تنقید کرنیوالوں کو آڑے ہاتھوں لے لیا

ترک وزیرِ خارجہ حاقان فیدان نے مکہ مشترکہ دفاعی معاہدے پر بے جا تنقید کرنے والے مغربی اور علاقائی نقادوں کو آڑے ہاتھوں لیتے ہوئے واضح کیا ہے کہ پاکستان، ترکیے اور سعودی عرب کے درمیان طے پانے والا یہ سہ فریقی اتحاد خطے میں دائمی امن و استحکام کی ضمانت ہے۔ نیویارک میں ایک عالمی سیمینار سے خطاب کرتے ہوئے ترک وزیرِ خارجہ نے تنقید کا جواب دیتے ہوئے نیٹو کی مثال پیش کی اور کہا کہ نیٹو کے 50 سالہ قیام کے دوران اجتماعی دفاع کے آرٹیکل 5 پر صرف ایک بار (نائن الیون کے بعد) عملدرآمد ہوا، مگر اس کے باوجود کسی نے بھی نیٹو اتحاد کو ‘کاغذی شیر’ نہیں کہا۔

حاقان فیدان نے نئے قائم ہونے والے اس دفاعی پیمان سے غیر منطقی توقعات وابستہ کرنے کی بھی نفی کی اور کہا کہ اس نو تشکیل شدہ عسکری اتحاد سے یمن کے 10 سالہ طویل اور پیچیدہ بحران کو فوراً حل کرنے کا مطالبہ بالکل غیر مناسب اور غیر حقیقت پسندانہ ہے۔ انہوں نے زور دیا کہ مکہ مشترکہ دفاعی معاہدہ رکن ممالک کی سلامتی اور خطے میں تزویراتی توازن برقرار رکھنے کے لیے ایک بنیادی اور سنگِ میل کی حیثیت رکھتا ہے۔