حج 2027 تا 2030: آن لائن رجسٹریشن کرانے والوں کی تعداد 3 لاکھ 40 ہزار سے متجاوز

وزارتِ مذہبی امور کے مطابق سال 2027 سے 2030 کے عازمینِ حج کی رجسٹریشن کا عمل ملک بھر میں تیزی سے جاری ہے، اور اب تک گھر بیٹھے آن لائن رجسٹریشن کروانے والے خوش نصیب عازمین کی مجموعی تعداد 3 لاکھ 40 ہزار سے تجاوز کر گئی ہے۔ ترجمان وزارتِ مذہبی امور کی جانب سے جاری کردہ تفصیلات کے مطابق، اب تک حاصل ہونے والی درخواستوں میں سے 2 لاکھ 46 ہزار عازمین نے سرکاری حج سکیم جبکہ 94 ہزار درخواست گزاروں نے پرائیویٹ حج سکیم کا انتخاب کیا ہے۔

وزارتِ مذہبی امور کی صوبہ وار اعداد و شمار کی رپورٹ کے مطابق پنجاب سے سب سے زیادہ 1 لاکھ 56 ہزار عازمین نے رجسٹریشن کروائی ہے۔ اس کے بعد سندھ سے 1 لاکھ، خیبرپختونخوا سے 51 ہزار، وفاقی دارالحکومت اسلام آباد سے 15 ہزار، بلوچستان سے 12 ہزار، آزاد کشمیر سے 2 ہزار 600 اور گلگت بلتستان سے 1 ہزار 200 عازمین اپنی رجسٹریشن مکمل کر چکے ہیں۔ ترجمان کا مزید کہنا تھا کہ حج واجبات کی آن لائن وصولی کا باقاعدہ اعلان جلد متوقع ہے۔ تمام رجسٹرڈ عازمین کو ہدایت کی گئی ہے کہ وہ کسی بھی قسم کی رہنمائی یا معلومات کے لیے وزارت کی آفیشل “پاک حج” ایپ یا حج ہیلپ لائنز سے رابطہ کریں۔ علاوہ ازیں، وزارتِ مذہبی امور نے تمام درخواست گزاروں پر زور دیا ہے کہ وہ رجسٹریشن کے دوران اپنے کوائف بالکل درست فراہم کریں اور گروپ کی صورت میں حج پر جانے کے لیے صرف اپنے فیملی ممبران کو ہی شامل کریں تاکہ مستقبل میں کسی بھی قسم کی قانونی یا انتظامی دشواری سے بچا جا سکے۔