8ذوالحج: مناسک حج کا آغاز، 20 لاکھ سے زائد عازمین منیٰ پہنچنے لگے

مکہ مکرمہ میں آج 8 ذوالحج کے ساتھ ہی مناسک حج کی باقاعدہ ادائیگی کا آغاز ہو گیا ہے، جبکہ عازمین حج کے قافلے منیٰ پہنچنے کا سلسلہ مسلسل جاری ہے۔

طوافِ قدوم اور احرام باندھنے کے بعد لاکھوں عازمین خصوصی بسوں اور ٹرینوں کے ذریعے خیموں کی بستی منیٰ منتقل ہو رہے ہیں، جہاں آج نمازِ ظہر سے قبل 20 لاکھ سے زائد حجاج کی موجودگی متوقع ہے۔

عازمین آج کی رات منیٰ میں قیام کریں گے اور عبادات میں مشغول رہیں گے، جبکہ کل 9 ذوالحج کو حج کے رکنِ اعظم وقوفِ عرفات کی ادائیگی کیلئے میدانِ عرفات روانہ ہوں گے۔

دوسری جانب حرمین شریفین انتظامیہ نے اعلان کیا ہے کہ مسجد نمرہ سے خطبۂ حج کے 20 زبانوں میں ترجمے کی تیاریاں مکمل کر لی گئی ہیں۔

انتظامیہ کے مطابق “منارۃ الحرمین” پلیٹ فارم کے تعاون سے یومِ عرفات کا خطبہ دنیا بھر میں بیک وقت مختلف زبانوں میں نشر کیا جائے گا تاکہ دنیا کے مختلف ممالک کے مسلمان براہِ راست اس سے استفادہ کر سکیں۔