قوم کو جینے دو، پٹرول پر جگا ٹیکس کسی صورت قبول نہیں: حافظ نعیم الرحمان

امیر جماعت اسلامی حافظ نعیم الرحمان نے پٹرولیم لیوی اور اضافی ٹیکسوں کے خلاف جاری ٹرین مارچ کے دوران حکومت کو شدید تنقید کا نشانہ بناتے ہوئے کہا ہے کہ پٹرول پر لیوی کو جگا ٹیکس کے طور پر کسی صورت قبول نہیں کیا جائے گا اور قوم کو جینے کا حق دیا جائے۔ رحیم یار خان پہنچنے پر جماعت اسلامی کے مقامی کارکنان اور عوام نے ٹرین مارچ کے شرکا اور حافظ نعیم الرحمان کا پرجوش استقبال کیا۔ رحیم یار خان اور بعد ازاں خان پور کے ریلوے اسٹیشنز پر اجتماع سے خطاب کرتے ہوئے انہوں نے واضح کیا کہ ان کی تحریک اور احتجاج مکمل طور پر پرامن ہے اور پرامن ہی رہے گا۔

حافظ نعیم الرحمان نے کہا کہ عوام پہلے ہی مہنگائی کے بوجھ تلے دبے ہوئے ہیں، اس کے باوجود حکومت پٹرولیم لیوی کی مد میں فی لٹر 130 روپے تک وصول کر کے اپنی عیاشیوں کا بوجھ عام شہریوں پر ڈال رہی ہے۔ انہوں نے اعلان کیا کہ جماعت اسلامی عوام کو اس معاشی استحصال سے نجات دلانے کے لیے سڑکوں پر نکلی ہے، اور جب تک پٹرولیم لیوی ٹیکس مکمل طور پر ختم نہیں کیا جاتا، یہ احتجاج ختم ہوگا اور نہ ہی جماعت اسلامی اپنے موقف سے پیچھے ہٹے گی۔ رحیم یار خان سے خان پور پہنچنے والے اس احتجاجی قافلے میں کارکنان کی بڑی تعداد موجود تھی۔