افغان طالبان سے شکوہ ہے کہ آپ اپنی زمین پاکستان کیخلاف استعمال ہونے سے نہیں روک رہے: حافظ نعیم

امیر جماعت اسلامی حافظ نعیم الرحمان نے افغانستان کی عبوری حکومت سے شدید شکوے کا اظہار کرتے ہوئے کہا ہے کہ افغان طالبان کی سرزمین کا پاکستان کے خلاف استعمال ہونا اور ان کا اسے نہ روک پانا انتہائی افسوسناک ہے۔ پاک-افغان کشیدہ تعلقات پر اظہارِ خیال کرتے ہوئے حافظ نعیم الرحمان نے تجویز دی کہ ریاستِ پاکستان، عالمی علما کی تنظیموں، مقامی قبائل کے نمائندوں اور چین، روس و ترکیہ جیسے ممالک کے ساتھ مل کر بات چیت کا راستہ اختیار کرے، جبکہ قبائلی عوام پر مشتمل ایک ‘گریٹر جرگہ’ اس دیرینہ مسئلے کو حل کر سکتا ہے۔ انہوں نے یاد دلایا کہ دونوں ممالک کے عوام نے تقریباً 50 سال ایک دوسرے کو سینے سے لگا کر رکھا ہے، پورا افغانستان تورا بورا بنا تو پاکستان نے بھی اس کی بھاری قیمت ادا کی، لہٰذا چند ناخوشگوار واقعات کی بنیاد پر یہ گہرا رشتہ ختم نہیں ہونا چاہیے۔ امیر جماعت اسلامی نے افغان طالبان سے دردمندی کے ساتھ اپنی سرزمین پاکستان کے خلاف استعمال نہ ہونے دینے کی اپیل کی، جبکہ حکومتِ پاکستان پر زور دیا کہ بارڈر ٹریڈ کی بحالی اور امن کے لیے مسلسل مذاکرات کیے جائیں، جس میں جماعت اسلامی بھی اپنا مثبت کردار ادا کرنے کے لیے تیار ہے۔