حکومت بجلی بلوں، پٹرولیم لیوی کے ذریعے عوام پر مسلسل بوجھ ڈال رہی ہے: حافظ نعیم الرحمان

امیر جماعت اسلامی حافظ نعیم الرحمن نے پنجاب کے شہر ملتان میں ایک تقریب سے خطاب کرتے ہوئے حکومت کی معاشی اور تعلیمی پالیسیوں پر شدید تنقید کی ہے۔ انہوں نے کہا کہ حکومت بجلی کے بلوں اور پٹرولیم لیوی کے ذریعے عوام پر مسلسل معاشی بوجھ ڈال رہی ہے، جبکہ غریب آدمی ہر چیز پر ٹیکس دینے کے باوجود بنیادی سہولیات سے محروم ہے۔ انہوں نے انکشاف کیا کہ پنجاب میں 11,000 سرکاری اسکول آؤٹ سورس کیے جا چکے ہیں جبکہ مزید 14,000 سے 15,000 اسکولوں کو آؤٹ سورس کرنے کی تیاری کی جا رہی ہے۔ حافظ نعیم الرحمن نے کشمیر کی صورتحال پر تشویش کا اظہار کرتے ہوئے کہا کہ وہاں عوام کا خون بہہ رہا ہے جبکہ حکمران خاندانی سیاست میں مصروف ہیں۔ انہوں نے نوجوانوں کے لیے جماعت اسلامی کے ‘بنو قابل’ کے بعد ‘ذی کنیکٹ’ نامی نئے پروگرام کا بھی اعلان کیا۔