پٹرول سستا کرو، لیوی ختم کرو، 7 اگست کو ملک گیر احتجاج ہوگا: حافظ نعیم الرحمان

امیر جماعت اسلامی حافظ نعیم الرحمن نے حکومت سے پٹرول کی قیمتوں میں فوری کمی اور پٹرولیم لیوی کے خاتمے کا مطالبہ کرتے ہوئے 7 اگست 2026 کو ملک گیر احتجاج کا اعلان کر دیا ہے۔ سماجی رابطے کی ویب سائٹ “ایکس” پر اپنے بیان میں انہوں نے پٹرولیم لیوی کو “جگا ٹیکس” اور عوام پر ڈاکہ قرار دیتے ہوئے کہا کہ پرامن سیاسی مزاحمت کے ذریعے حقوق حاصل کیے جائیں گے۔ حافظ نعیم الرحمن نے طلبہ، نوجوانوں، بائیک رائڈرز، ڈیلیوری بوائز، مزدوروں اور کسانوں سمیت پوری قوم سے اپیل کی کہ وہ موٹر سائیکلوں اور گاڑیوں کے ساتھ 7 اگست کے احتجاج میں بھرپور شرکت کریں تاکہ حکومت کو عوامی مطالبات تسلیم کرنے پر مجبور کیا جا سکے۔