بھارت میں امریکی قونصل خانوں میں H-1B ویزا انٹرویوز 2027 تک ملتوی، ہزاروں پروفیشنلز پھنس گئے

بھارت میں امریکی قونصل خانوں کی جانب سے H-1B ویزا انٹرویوز کی تاریخیں 2027 تک منتقل کیے جانے سے ہزاروں بھارتی پروفیشنلز شدید مشکلات کا شکار ہو گئے ہیں۔ آئی ٹی ماہرین، ڈاکٹرز، اساتذہ اور دیگر ہنرمند افراد جو مختصر مدت کے لیے وطن واپس جانا چاہتے تھے، اب برسوں تک امریکا واپس نہ جا سکنے کے خدشے سے دوچار ہیں۔

این ڈی ٹی وی کے مطابق 25 جنوری 2026 تک نئی دہلی، ممبئی، چنئی، حیدرآباد اور کولکتہ میں واقع تمام امریکی قونصل خانوں میں H-1B ویزا اسٹیمپنگ کے باقاعدہ اپائنٹمنٹس اپریل اور مئی 2027 سے قبل دستیاب نہیں۔ یہ بحران دسمبر 2025 میں اس وقت سنگین ہوا جب متعدد اپائنٹمنٹس منسوخ کر کے پہلے مارچ 2026 اور بعد ازاں اکتوبر 2026 تک منتقل کی گئیں، جنہیں حالیہ دنوں میں مزید آگے بڑھا دیا گیا۔

قونصلر حکام اس تاخیر کی وجہ واشنگٹن میں پالیسی تبدیلیوں کو قرار دے رہے ہیں، جن میں تمام روزگار پر مبنی ویزوں کے لیے سوشل میڈیا اسکریننگ کا نفاذ اور بھارتی شہریوں کے لیے تھرڈ کنٹری ویزا اسٹیمپنگ کی سہولت کا خاتمہ شامل ہے۔

ایچ ون بی ویزا رکھنے والے افراد اگر امریکا سے باہر ہوں تو نئے اسٹیمپ کے بغیر واپسی ممکن نہیں، جس کے باعث ہزاروں افراد بھارت میں پھنس چکے ہیں۔ ماہرین کے مطابق اس صورتحال سے امریکی کمپنیوں کے منصوبے متاثر ہو رہے ہیں اور بعض ادارے اہم کام کینیڈا یا میکسیکو منتقل کرنے پر مجبور ہیں۔