گیانا، مسافروں سے بھری فیری سمندر میں ڈوب گئی، 41 افراد ہلاک، درجنوں لاپتہ

جنوبی امریکی ملک گیانا کے ساحل کے قریب 179 مسافروں کو لے جانے والی مسافر فیری الٹنے کے بھیانک حادثے میں ہلاکتوں کی تعداد بڑھ کر 41 ہو گئی ہے، جبکہ 61 افراد تاحال لاپتا ہیں۔ امدادی ٹیمیں کئی روز گزر جانے کے باوجود سمندر میں ڈوبنے والے متاثرین کی تلاش میں مسلسل مصروف ہیں۔

گیانا کی حکومت کے مطابق سرچ اینڈ ریسکیو آپریشن کے دوران اب تک 77 افراد کو باحفاظت زندہ بچا لیا گیا ہے۔ حکام نے بتایا کہ “ایم وی باریما” (MV Barima) نامی فیری دارالحکومت جارج ٹاؤن سے پورٹ کیتھوما جا رہی تھی کہ شمالی بحرِ اوقیانوس میں ساحل سے تقریباً 7 میل دور اچانک الٹ گئی۔

وزیرِ تعمیرات خوان ایج ہل (Juan Edghill) نے ذرائع ابلاغ کو بتایا کہ ابتدائی طور پر فیری میں 133 مسافروں کی موجودگی کا بتایا گیا تھا، تاہم بورڈنگ کی ویڈیو فوٹیج کا باریک بینی سے جائزہ لینے پر انکشاف ہوا کہ کشتی میں مجموعی طور پر 179 افراد سوار تھے، جس کے باعث ریسکیو کارروائی مزید پیچیدہ اور دشوار ہو گئی۔

حکام کے مطابق حادثے سے قبل فیری کی جانب سے ایئر ٹریفک کنٹرول کو ہنگامی پیغام (Emergency Signal) موصول ہوا تھا، جس کے فوراً بعد ریسکیو آپریشن کا آغاز کیا گیا لیکن اندھیرے اور جدید سرچ آلات کی کمی کے باعث ابتدائی کارروائیوں میں شدید مشکلات کا سامنا کرنا پڑا۔ بعد ازاں تیل و گیس کمپنیوں نے جدید اسکینرز سے لیس جہاز اور غوطہ خور فراہم کیے، جبکہ سرچ ایریا کو 400 مربع کلومیٹر سے بڑھا کر 1,040 مربع کلومیٹر تک وسیع کر دیا گیا ہے۔

وزیرِ تعمیرات نے سنسنی خیز انکشاف کرتے ہوئے بتایا کہ فیری کے کپتان اور عملے کے دیگر ارکان کو حراست میں لے لیا گیا ہے۔ طبی معائنے کے دوران کپتان اور کم از کم ایک عملے کے رکن کا چرس (ماریجوانا) ٹیسٹ مثبت آیا ہے، جبکہ یہ بات بھی سامنے آئی ہے کہ بچ جانے والے متعدد افراد کا نام مسافروں کی سرکاری لسٹ میں درج ہی نہیں تھا۔ حکام نے مزید بتایا کہ فیری کی 2024 میں مرمت کی گئی تھی اور رواں سال اس کا تکنیکی معائنہ بھی شیڈول تھا۔