یونان میں فضائی مظاہرے کے دوران ایف-4 فینٹم جنگی طیارہ تباہ

ایتھنز: یونان میں ایک ایئر شو (فضائی مظاہرے) کے دوران یونانی فضائیہ کا ایف-4 فینٹم (F-4 Phantom) جنگی طیارہ حادثے کا شکار ہو کر گر کر تباہ ہو گیا۔

بین الاقوامی خبر رساں ایجنسی کے مطابق یہ واقعہ دارالحکومت ایتھنز کے قریب واقع تناگرا ایئرپورٹ پر پیش آیا، جہاں طیارہ پرواز کے دوران اچانک قابو سے باہر ہو کر تماشائیوں کے بیٹھنے کی جگہ سے چند سو میٹر کے فاصلے پر زمین سے جا ٹکرایا۔ حادثے کے وقت ایئر شو میں ہزاروں تماشائی موجود تھے تاہم تمام شہری محفوظ رہے۔ طیارے کے گرتے ہی جائے وقوعہ سے شدید آگ اور دھوئیں کے بادل اٹھتے دیکھے گئے۔

یونانی فضائی حکام کے مطابق طیارے میں دو پائلٹس سوار تھے جن کی صورتحال کے بارے میں فوری طور پر آگاہی حاصل نہیں ہو سکی ہے۔ حادثے کے فوری بعد امدادی ٹیمیں حرکت میں آ گئیں اور آگ پر قابو پانے کے لیے دو فائر فائٹنگ ہیلی کاپٹرز موقع پر پہنچ گئے۔ پائلٹس کی تلاش کے لیے بڑے پیمانے پر سرچ اینڈ ریسکیو آپریشن شروع کر دیا گیا ہے، جبکہ حادثے کی بنیادی وجہ جاننے کے لیے تحقیقات کا آغاز کر دیا گیا ہے۔