میری گورنر شپ کا ایک ایک منٹ پنجاب کے لوگوں کیلئے ہے:گورنر پنجاب

گورنر پنجاب سردار سلیم حیدر خان نے واضح کیا ہے کہ ان کی گورنر شپ کا ایک ایک منٹ پنجاب کے عوام کی خدمت کے لیے وقف ہے اور وہ صوبے کے پسماندہ اضلاع کی ترقی کے لیے تمام تر وسائل بروئے کار لائیں گے۔ گورنر ہاؤس لاہور میں منعقدہ ایک اہم اجلاس کی صدارت کرتے ہوئے انہوں نے ضلع اٹک میں نئی تحصیل ‘نرڑہ’ کے قیام کے حوالے سے پیش رفت کا تفصیلی جائزہ لیا۔ اس موقع پر بورڈ آف ریونیو کے حکام نے بریفنگ دیتے ہوئے بتایا کہ تحصیل جنڈ کی سات یونین کونسلز پر مشتمل اس نئی تحصیل کا قیام عوامی مطالبہ ہے، جس سے نہ صرف انتظامی معاملات میں بہتری آئے گی بلکہ مقامی لوگوں کو ان کی دہلیز پر سرکاری خدمات میسر ہوں گی۔ گورنر پنجاب نے زور دیا کہ دور دراز علاقوں کی پسماندگی دور کرنے کے لیے ایسے اقدامات ناگزیر ہیں، جبکہ بریفنگ میں یہ بھی واضح کیا گیا کہ بورڈ آف ریونیو رولز کے تحت تحصیل نرڑہ کا کیس قانونی مراحل مکمل ہونے کے بعد جلد منظوری کے لیے صوبائی کابینہ میں پیش کر دیا جائے گا۔