مسلسل کمی کے بعد سونا ہزاروں روپے مہنگا ہوگیا

عالمی اور مقامی صرافہ مارکیٹوں میں مسلسل چار روز کی مندی کے بعد آج سونے کی قیمتوں میں زبردست تیزی دیکھی گئی ہے اور فی تولہ سونا ہزاروں روپے مہنگا ہو گیا۔ عالمی مارکیٹ میں فی اونس سونے کی قیمت 47 ڈالر کے اضافے کے بعد 4 ہزار 305 ڈالر کی سطح پر پہنچ گئی۔ عالمی مارکیٹ میں قیمتیں بڑھنے کے مثبت اثرات مقامی سطح پر بھی مرتب ہوئے، جس سے ملکی صرافہ بازاروں میں سونے کی قدر میں نمایاں اضافہ ریکارڈ کیا گیا۔

مقامی مارکیٹ میں فی تولہ سونے کی قیمت میں 4 ہزار 700 روپے کا بڑا اضافہ ہوا جبکہ دس گرام سونے کی قیمت میں 4 ہزار 29 روپے کا اضافہ درج کیا گیا۔ اس حالیہ اضافے کے بعد مقامی صرافہ بازاروں میں فی تولہ سونے کی نئی قیمت 4 لاکھ 53 ہزار 36 روپے اور دس گرام سونے کی قیمت 3 لاکھ 88 ہزار 404 روپے کی اونچی سطح پر پہنچ گئی۔