اداروں اور سیاسی قیادت کا ایک دوسرے کو ذہنی مریض کہنا افسوسناک ہے، بیرسٹر گوہر

پاکستان تحریکِ انصاف کے چیئرمین بیرسٹر گوہر علی خان نے ریاستی اداروں اور سیاسی قیادت کے درمیان تلخ بیانات پر افسوس کا اظہار کرتے ہوئے کہا ہے کہ ایک دوسرے کو “ذہنی مریض” قرار دینا ملکی ماحول کے لیے انتہائی نقصان دہ ہے۔

سوشل میڈیا پر جاری بیان میں بیرسٹر گوہر نے کہا کہ بانی پی ٹی آئی اور بشریٰ بی بی جیل میں ہیں، اگر ملاقاتوں کی اجازت مل جائے تو معاملات بہتری کی طرف جا سکتے ہیں۔

انہوں نے واضح کیا کہ ملک کا دفاع سب سے مقدم ہے اور پی ٹی آئی کا بیانیہ نہ کبھی ملک دشمن تھا، نہ ہے اور نہ ہوگا۔
ان کا کہنا تھا کہ پاکستان بھی ہمارا ہے، فوج بھی ہماری ہے، اس وقت ضرورت اس بات کی ہے کہ سب ایک دوسرے کو تسلیم کریں، جگہ دیں اور اعتماد کے فقدان کو ختم کریں، کیونکہ ملک مزید تناؤ اور انتشار کا متحمل نہیں ہوسکتا۔

بیرسٹر گوہر نے تمام جمہوریت پسند قوتوں سے سیاسی درجہ حرارت کم کرنے کے لیے کردار ادا کرنے کی اپیل بھی کی۔

یاد رہے کہ حالیہ پریس کانفرنس میں ڈی جی آئی ایس پی آر لیفٹیننٹ جنرل احمد شریف چوہدری نے بانی پی ٹی آئی عمران خان کو “ذہنی مریض” قرار دیا تھا اور کہا تھا کہ عمران خان سے جو بھی ملتا ہے وہ ریاست اور فوج کے خلاف بیانیہ دیتا ہے۔