امریکہ ایران کشیدگی: ڈونلڈ ٹرمپ کے ٹوئٹ نے عالمی منڈی میں آگ لگا دی؛ خام تیل 104 ڈالر سے تجاوز کر گیا

امریکہ اور ایران کے درمیان اسلام آباد مذاکرات میں تعطل اور بڑھتی ہوئی کشیدگی کے باعث عالمی منڈی میں خام تیل کی قیمتوں میں ہوش ربا اضافہ ریکارڈ کیا گیا ہے۔ امریکی صدر ڈونلڈ ٹرمپ کے حالیہ ٹوئٹ نے جلتی پر تیل کا کام کیا، جس کے فوری بعد عالمی مارکیٹ میں تیل کی قیمت 104 ڈالر کی حد عبور کر گئی۔ مذاکرات میں ناکامی اور ناکہ بندی کے خدشات نے سپلائی چین سے متعلق سرمایہ کاروں کے اضطراب کو بڑھا دیا ہے، جس کے نتیجے میں قیمتوں میں حالیہ مہینوں کا سب سے بڑا اچھال دیکھا جا رہا ہے۔

اعداد و شمار کے مطابق، عالمی مارکیٹ میں امریکی خام تیل (WTI) کی قیمت میں 8 ڈالر 40 سینٹس کا بڑا اضافہ ہوا، جس کے بعد یہ 104 ڈالر 97 سینٹس کی سطح پر پہنچ گئی ہے۔ اسی طرح برطانوی خام تیل (Brent) کی قیمت بھی 6 ڈالر 94 سینٹس اضافے کے ساتھ 102 ڈالر 14 سینٹس تک جا پہنچی ہے۔ دیگر پیٹرولیم مصنوعات بھی اس لہر سے متاثر ہوئی ہیں، جہاں ماربن کروڈ 98 ڈالر 16 سینٹس اور نیچرل گیس کی قیمت 2 ڈالر 66 سینٹس ریکارڈ کی گئی ہے۔ معاشی ماہرین کا کہنا ہے کہ اگر امریکہ اور ایران کے درمیان سفارتی تعطل برقرار رہا تو آنے والے دنوں میں توانائی کا عالمی بحران مزید سنگین صورتحال اختیار کر سکتا ہے۔