تیل کی منڈیوں میں بھونچال، عالمی مارکیٹ میں قیمت 108 ڈالر فی بیرل پر پہنچ گئی

آبنائے ہرمز کی جزوی بندش اور یمن کے ساحلی شہر موخا کے ساتھ باب المندب کے انتہائی اہم سٹریٹجک مقام پر حوثی جنگجوؤں کے قبضے کے باعث عالمی سطح پر ایندھن کی منڈیوں میں شدید بھونچال آ گیا ہے اور تیل کے نرخوں میں مسلسل اضافے کا سلسلہ جاری ہے۔ عالمی بازارِ حصص اور ایندھن کی مارکیٹ میں برطانوی خام تیل (Brent Crude) کی قیمت مزید بڑھ کر 108 ڈالر فی بیرل کی سطح پر پہنچ گئی ہے، جو کہ گزشتہ 4 ماہ کے دوران ریکارڈ کی جانے والی بلند ترین قیمت ہے۔

اسی طرح امریکی خام تیل (WTI) کی قیمت بھی زبردست اضافے کے ساتھ 103 ڈالر فی بیرل سے اوپر چلی گئی ہے۔ عالمی مارکیٹ میں پیدا ہونے والے اس سپلائی بحران کے باعث متحدہ عرب امارات کے مربن کروڈ آئل (Murban Crude) کی قیمت 116 ڈالر فی بیرل کی نئی ریکارڈ سطح کو چھو گئی ہے۔ خام تیل کے ساتھ ساتھ بین الاقوامی سطح پر قدرتی گیس (Natural Gas) کے نرخوں میں بھی تیز رفتار اضافہ ریکارڈ کیا جا رہا ہے، جس سے آنے والے دنوں میں عالمی معیشت اور افراطِ زر پر شدید ترین منفی اثرات مرتب ہونے کا اندیشہ ہے۔