ایئربس سافٹ ویئر میں سنگین خرابی؛ دنیا بھر میں سینکڑوں پروازیں منسوخ، متعدد ایئر لائنز متاثر

وسیع پیمانے پر استعمال ہونے والے ایئربس اے 320 فیملی کے طیاروں میں سنگین سافٹ ویئر خرابی سامنے آنے کے بعد دنیا بھر کی ایئر لائنز نے ہفتے کے اختتام سے قبل سینکڑوں پروازیں منسوخ کر دیں، جب کہ متعدد ممالک میں فضائی آپریشن شدید متاثر ہوا۔

ایسوسی ایٹڈ پریس کے مطابق مسئلے کی نشاندہی اس وقت ہوئی جب 30 اکتوبر کو امریکی ایئرلائن جیٹ بلیو کے ایک طیارے کی رفتار دورانِ پرواز اچانک کم ہوئی اور طیارہ نیچے کی جانب جھکنے لگا، جس کے بعد شبہ ظاہر کیا گیا کہ خرابی فلائٹ کنٹرول سسٹم کے اہم ڈیٹا سے جڑی سافٹ ویئر گڑبڑ کا نتیجہ ہو سکتی ہے۔ یورپ کی ایوی ایشن کمپنی ایئربس نے تصدیق کی کہ شدید شمسی تابکاری اے 320 فیملی کے طیاروں کے کچھ اہم سسٹمز کو متاثر کر سکتی ہے، جب کہ یورپی یونین ایوی ایشن سیفٹی ایجنسی نے ہدایت جاری کرتے ہوئے مسئلے کے حل کو لازمی قرار دیا ہے اور خبردار کیا ہے کہ اس کے باعث پروازوں کے شیڈول میں عارضی خلل ناگزیر ہے۔ یہ خرابی اے 320 طیاروں کے حالیہ سافٹ ویئر اپ ڈیٹ کے بعد سامنے آئی، جو امریکہ میں تھینکس گیونگ ہالیڈیز کے فوراً بعد مسافروں کی بڑے پیمانے پر واپسی کے دوران ہوا، یعنی جب ملک کا سب سے مصروف سفری سیزن جاری تھا۔

جاپان کی آل نپون ایئرویز نے ہفتے کے روز 65 ملکی پروازیں منسوخ کیں، جب کہ امریکن ایئرلائنز کے بیڑے میں شامل 480 میں سے 209 طیارے متاثر ہوئے، تاہم کمپنی کا کہنا ہے کہ زیادہ تر پرزے دو گھنٹے میں اپڈیٹ ہو جائیں گے اور منسوخی کم سے کم رکھی جائے گی۔ ڈیلٹا نے بتایا کہ اس کے 50 سے کم اے 321 نیو طیارے متاثر ہیں، یونائیٹڈ کے مطابق اس کے صرف 6 طیاروں میں معمولی تاخیر کا امکان ہے، جب کہ ہوائیئن ایئر لائنز نے کہا کہ اس کی پروازیں متاثر نہیں ہوں گی۔ جرمن ایئرلائن نے خبردار کیا ہے کہ کچھ طیاروں کی مرمت میں کئی گھنٹے لگ سکتے ہیں، جس سے ہفتے کے آخر میں پروازیں منسوخ یا تاخیر کا شکار ہوں گی۔ کولمبیا کی ایویانکا نے صورتحال کو زیادہ سنگین قرار دیتے ہوئے بتایا کہ اس کے بیڑے کا 70 فیصد متاثر ہے اور آئندہ 10 دنوں میں نمایاں آپریشنل خلل ہوگا، حتیٰ کہ 8 دسمبر تک نئی ٹکٹوں کی فروخت بھی روک دی گئی ہے۔

برٹش ایئرویز کے تین مختصر فاصلے کے اے 320 طیارے متاثر ہیں مگر ایئرلائن کا کہنا ہے کہ کوئی بڑا آپریشنل اثر متوقع نہیں، جبکہ ایئر فرانس 35 پروازیں منسوخ کر چکا ہے۔ ایئرنیوزی لینڈ نے بھی اپنے تمام اے 320 نیو طیاروں میں فوری سافٹ ویئر اپڈیٹ کا اعلان کیا ہے جس سے پروازوں کی تعداد متاثر ہونے کا امکان ہے۔ ہوابازی ماہر مائیک اسٹینگل کے مطابق یہ خرابی پروازوں کے درمیان یا رات کے وقت روٹین چیک کے دوران بھی دور کی جا سکتی ہے۔

پاکستان انٹرنیشنل ایئر لائن (پی آئی اے) نے مسافروں کو اطمینان دلایا ہے کہ اس کا بیڑہ محفوظ ہے کیونکہ پی آئی اے کے طیاروں میں وہ نیا سافٹ ویئر اپڈیٹ (ورژن 104) انسٹال ہی نہیں کیا گیا تھا، جس میں خرابی پائی گئی ہے۔ ترجمان کے مطابق ایئربس نے تمام ایئرلائنز کو پرانا ورژن دوبارہ لوڈ کرنے کی ہدایات جاری کی ہیں، تاہم پی آئی اے کے جہاز پرانا مستحکم ورژن ہی استعمال کر رہے ہیں، لہٰذا کوئی خطرہ لاحق نہیں۔