امریکہ ایران مذاکرات میں مثبت پیشرفت، عالمی منڈی میں خام تیل کی قیمتیں گر گئیں

امریکہ اور ایران کے درمیان سفارتی مذاکرات میں مثبت پیشرفت کے بعد عالمی مارکیٹ میں خام تیل کی قیمتیں گزشتہ 4 ماہ کی کم ترین سطح پر آ گئی ہیں۔ اس سفارتی پیشرفت نے عالمی توانائی مارکیٹ پر گہرے اثرات مرتب کیے ہیں۔

مارکیٹ ذرائع کے مطابق، عالمی سطح پر برطانوی خام تیل (Brent Crude) کے مستقبل کے معاہدوں کی قیمت میں 1.89 فیصد کمی ریکارڈ کی گئی، جس کے بعد اس کی قیمت گر کر 71.57 ڈالر فی بیرل پر آ گئی۔ دوسری جانب، امریکی ویسٹ ٹیکساس انٹرمیڈیٹ (WTI) خام تیل کی قیمت بھی 1.32 فیصد کمی کے ساتھ 68.58 ڈالر فی بیرل رہ گئی ہے۔

مربن خام تیل کی صورتحال: سب سے نمایاں کمی متحدہ عرب امارات کے مربن خام تیل کی قیمتوں میں دیکھی گئی، جہاں قیمت 5.25 فیصد گرنے کے بعد 65.39 ڈالر پر بند ہوئی۔ عالمی معیار کے حامل یہ تیل مارچ کے بعد اپنی کم ترین اختتامی سطح پر بند ہوئے ہیں، جو عالمی مارکیٹ میں سرمایہ کاروں کے بدلتے ہوئے اعتماد کو ظاہر کرتا ہے۔ اقتصادی اور  دفاعی تجزیہ کاروں کا کہنا ہے کہ واشنگٹن اور تہران کے درمیان تعلقات میں یہ بہتری عالمی توانائی مارکیٹ کے لیے انتہائی اہم ہے۔ اگر دونوں ممالک کے درمیان مذاکرات کامیابی سے ہمکنار ہوتے ہیں اور ایران پر عائد اقتصادی پابندیاں نرم ہوتی ہیں، تو عالمی منڈی میں ایرانی تیل کی رسد (Supply) میں بڑا اضافہ ہوگا۔ سپلائی بڑھنے کی صورت میں آنے والے دنوں میں تیل کی قیمتیں مزید نیچے آسکتی ہیں۔