اٹلی: سکولوں میں نقاب پر پابندی، غیر ملکی طلبہ کی حد مقرر کا اعلان

اٹلی کی وزیراعظم جارجیا میلونی نے اعلان کیا ہے کہ ان کی حکومت ملک بھر کے تمام اسکولوں میں برقع و چہرہ ڈھانپنے والے نقاب پر مکمل پابندی عائد کرنے اور کلاس رومز میں غیر ملکی طلبہ کی تعداد کی حتمی حد مقرر کرنے کے لیے قانون سازی کی تیاری کر رہی ہے۔ اپنی سیاسی جماعت ‘برادرز آف اٹلی’ کی نوجوانوں کے ساتھ سالانہ تقریب سے خطاب کرتے ہوئے اطالوی وزیراعظم نے بتایا کہ ان کی کابینہ جلد ایک جامع بل پیش کرے گی جس کے تحت ہر جماعت میں غیر ملکی شہریوں اور تارکینِ وطن کے بچوں کا ایک خاص تناسب طے کیا جائے گا۔

جارجیا میلونی نے واضح کیا کہ تعلیمی اداروں میں ہر طالب علم کا چہرہ واضح نظر آنا چاہیے اور کسی کو بھی حقیقی یا فرضی مذہبی و ثقافتی روایت کا سہارا لے کر کسی نوجوان طالبہ یا خاتون کو اپنا چہرہ چھپانے پر مجبور کرنے کی اجازت نہیں دی جا سکتی۔ انہوں نے مزید کہا کہ اگر کسی کلاس میں ایک یا دو بچے اطالوی زبان نہ جانتے ہوں تو وہ اپنے ہم جماعتوں کے ساتھ رہ کر جلدی زبان سیکھ سکتے ہیں، لیکن اگر ان کی تعداد اکثریت میں بدل جائے تو یہ مربوط انضمام کی بجائے سنگین غفلت بن جاتا ہے۔ اس کے علاوہ اطالوی تعلیمی نظام میں نہ ڈھلنے والے بچوں کے والدین پر بھی اطالوی زبان سیکھنے کی شرط عائد کی جائے گی۔