گھوٹکی: کچے کے علاقے میں دو گروپوں میں خونی تصادم، فائرنگ سے 5 افراد جاں بحق

گھوٹکی: قادر پور کے کچے کے علاقے میں دو مسلح گروپوں کے درمیان ہونے والے شدید تصادم کے نتیجے میں 5 افراد جاں بحق ہو گئے ہیں۔ پولیس ذرائع کے مطابق، لولائی اور جاگیرانی گروپوں کے درمیان فائرنگ کا تبادلہ جاری ہے جس نے علاقے میں شدید خوف و ہراس پھیلا دیا ہے۔

پولیس حکام کا کہنا ہے کہ جاں بحق ہونے والوں میں لولائی گروہ کے راحب لولائی، ماکڑو لولائی اور مہر لولائی شامل ہیں۔ دوسری جانب، فائرنگ کے نتیجے میں جاگیرانی گروہ کے دو ارکان، نور جاگیرانی اور ہدایت جاگیرانی بھی مارے گئے ہیں۔

کچے کے دشوار گزار علاقے میں دونوں جانب سے جدید ہتھیاروں کا استعمال کیا جا رہا ہے اور فائرنگ کا سلسلہ وقفے وقفے سے جاری ہے۔ پولیس کی بھاری نفری کو علاقے کی جانب روانہ کر دیا گیا ہے تاکہ صورتحال پر قابو پایا جا سکے اور مزید جانی نقصان کو روکا جا سکے۔ ابتدائی اطلاعات کے مطابق یہ تصادم دیرینہ دشمنی کا شاخسانہ معلوم ہوتا ہے۔