جنیوا میں امریکا اور یوکرین وفود کی ملاقات نتیجہ خیز، نئے امن فریم ورک پر اتفاق

جنیوا میں امریکا اور یوکرین کے وفود کے درمیان ہونے والی ملاقات انتہائی نتیجہ خیز رہی ہے، جس میں مذاکرات کاروں نے ایک نیا اور بہتر امن فریم ورک تیار کیا ہے۔

میڈیا رپورٹس کے مطابق وائٹ ہاؤس کے ترجمان نے بتایا کہ ملاقات کے دوران دونوں ممالک کے وفود نے روس کے ساتھ امن معاہدے میں یوکرین کی خودمختاری کو برقرار رکھنے پر اتفاق کیا۔ وفود نے منصفانہ اور دیرپا امن کے حصول کے لیے مشترکہ عزم کا اظہار بھی کیا۔

ترجمان نے کہا کہ مذاکرات کاروں نے اس بات کی توثیق کی کہ کوئی بھی مستقبل کا معاہدہ یوکرین کی خودمختاری کو مکمل طور پر برقرار رکھے گا۔ مزید برآں، یوکرین اور امریکہ نے آنے والے دنوں میں مشترکہ تجاویز پر مزید بھرپور کام جاری رکھنے پر بھی اتفاق کیا۔

امریکی سینیٹر مارکو روبیو نے اس موقع پر کہا کہ حتمی معاہدہ دونوں ممالک کے صدور کی منظوری سے ہونا چاہیے، اور کریملن کو شامل کرنے سے پہلے چند اہم مسائل کو حل کرنا ہوگا۔

اس ملاقات کا مقصد خطے میں دیرپا امن اور استحکام کو یقینی بنانا اور یوکرین کی خودمختاری کو تحفظ فراہم کرنا ہے، جبکہ عالمی برادری بھی اس پر قریبی نظر رکھے ہوئے ہے۔