گوگل جیمنائی میں سب سے بڑی اپ ڈیٹ: پرسنل انٹیلی جنس فیچر متعارف

کیلیفورنیا: گوگل نے اپنے آرٹیفیشل انٹیلی جنس ماڈل جیمنائی میں اب تک کی سب سے بڑی اپ ڈیٹ متعارف کروا دی ہے، جسے پرسنل انٹیلی جنس کا نام دیا گیا ہے۔ اس اپ ڈیٹ کو اے آئی کے شعبے میں ایک نمایاں پیشرفت قرار دیا جا رہا ہے۔

غیر ملکی خبر رساں ایجنسی کے مطابق اس فیچر کی مدد سے جیمنائی گوگل ایپس میں صارف کے ذاتی ڈیٹا کا تجزیہ کرے گا اور سوالات کے زیادہ تفصیلی اور ذاتی نوعیت کے جوابات فراہم کرے گا۔ پرسنل انٹیلی جنس کے تحت جیمنائی گوگل سرچ، جی میل، گوگل فوٹوز اور یوٹیوب سمیت متعدد ایپس تک رسائی حاصل کر سکے گا۔

گوگل کا کہنا ہے کہ اس فیچر کے ذریعے جیمنائی ایک حقیقی اے آئی پرسنل اسسٹنٹ بن جائے گا۔ مثال کے طور پر صارف گاڑی کے مسئلے کے بارے میں سوال کرے تو جیمنائی گوگل ایپس میں موجود معلومات اور گوگل فوٹوز کے ذریعے گاڑی کی حالت دیکھ کر یوٹیوب ویڈیوز کی مدد سے حل تجویز کر سکے گا۔

ابتدائی طور پر یہ فیچر امریکا میں متعارف کرایا گیا ہے اور گوگل اے آئی پرو اور اے آئی الٹرا سبسکرپشن پلان کے صارفین کے لیے دستیاب ہوگا۔ کمپنی کا کہنا ہے کہ آئندہ مہینوں میں اس فیچر کو دیگر ممالک اور مفت صارفین تک بھی توسیع دی جائے گی۔