جاسم البدیوی کی یو این سیکرٹری جنرل سے ملاقات، علاقائی صورتحال پر تبادلہ خیال

خلیج تعاون کونسل (جی سی سی) کے سیکرٹری جنرل جاسم محمد البدیوی اور اقوامِ متحدہ کے سیکرٹری جنرل انتونیو گوتریس کے درمیان نیویارک میں ایک اہم ملاقات ہوئی ہے۔ خبر ایجنسی کے مطابق، اس ملاقات کے دوران جی سی سی اور اقوامِ متحدہ کے مابین باہمی تعلقات، دوطرفہ تعاون کو مزید مستحکم بنانے اور مشترکہ امور پر تفصیلی تبادلہ خیال کیا گیا۔ دونوں رہنماؤں نے عالمی و علاقائی سطح پر ہونے والی سیاسی پیشرفت، درپیش چیلنجز کے سفارتی حل اور خطے میں پائیدار امن و استحکام کے فروغ کے لیے جاری کوششوں کا جائزہ لیا۔

ملاقات کے بعد جاری کردہ مشترکہ بیان میں سعودی عرب پر حوثی ملیشیا کے حملوں اور بالخصوص عام شہریوں کو نشانہ بنانے کے اقدامات کی سخت الفاظ میں مذمت کی گئی۔ بیان میں واضح کیا گیا کہ حوثی ملیشیا کی یہ کارروائیاں خطے کے امن و سلامتی کے لیے شدید خطرہ ہیں اور اس قسم کے پے درپے حملے علاقائی استحکام کو سنگین حد تک متاثر کر سکتے ہیں، جس کا فوری تدارک ضروری ہے۔