پیٹرول کی قیمتوں میں اضافے کے بعد مہنگائی کا طوفان، 22 اشیا مزید مہنگی

پیٹرول اور ڈیزل کی قیمتوں میں اضافے کے بعد ملک میں مہنگائی کا دباؤ مزید بڑھ گیا ہے اور حالیہ ہفتے کے دوران 22 اشیائے ضروریہ کی قیمتوں میں اضافہ ریکارڈ کیا گیا ہے۔

وفاقی ادارہ شماریات کی جاری کردہ ہفتہ وار رپورٹ کے مطابق مہنگائی کی شرح میں 0.79 فیصد اضافہ ہوا جبکہ سالانہ بنیادوں پر یہ شرح 15.16 فیصد تک پہنچ گئی۔

رپورٹ میں بتایا گیا ہے کہ حالیہ ہفتے کے دوران 22 اشیا مہنگی ہوئیں، 14 اشیا کی قیمتوں میں کمی جبکہ 15 اشیا کی قیمتیں برقرار رہیں۔

اعداد و شمار کے مطابق چکن کی قیمت میں سب سے زیادہ اضافہ ہوا اور ایک ہفتے میں فی کلو قیمت 48 روپے 40 پیسے بڑھ گئی۔ آٹے کے 20 کلو کے تھیلے کی قیمت میں بھی 74 روپے 75 پیسے اضافہ ریکارڈ کیا گیا۔

ادارہ شماریات کے مطابق ڈیزل 19 روپے 47 پیسے اور پیٹرول 6 روپے 56 پیسے فی لیٹر مہنگا ہوا، جس کے اثرات دیگر اشیائے خورونوش پر بھی پڑے۔

رپورٹ میں کہا گیا ہے کہ دہی، دودھ، بیف، مٹن، چائے، آلو، کیلے، کوکنگ آئل، خشک دودھ اور سگریٹ کی قیمتوں میں بھی اضافہ دیکھا گیا۔

تاہم ٹماٹر، پیاز، لہسن، انڈے اور مختلف دالوں کی قیمتوں میں کچھ کمی ریکارڈ کی گئی۔

ادارہ شماریات کے مطابق پیٹرولیم مصنوعات اور غذائی اشیا کی قیمتوں میں مسلسل اضافے سے عوام پر مہنگائی کا بوجھ مزید بڑھ رہا ہے۔