ایف پی سی سی آئی کا وزیراعظم اور فیلڈ مارشل کو ’نوبل امن انعام‘ دینے کا مطالبہ

فیڈریشن آف پاکستان چیمبرز آف کامرس اینڈ انڈسٹری (FPCCI) کے سینیئر نائب صدر ثاقب فیاض مگوں نے دیگر عہدیداران کے ہمراہ ایک اہم پریس کانفرنس کرتے ہوئے مشرقِ وسطیٰ میں جنگ بندی کے لیے پاکستان کے کلیدی کردار کو سراہا ہے۔ انہوں نے کہا کہ وزیراعظم شہباز شریف اور فیلڈ مارشل سید عاصم منیر نے امریکہ اور ایران کو مذاکرات کی میز پر لا کر ثابت کر دیا ہے کہ پاکستان کی خارجہ پالیسی انتہائی کامیاب اور ملک سرمایہ کاری کے لیے محفوظ ترین مقام ہے۔ اس تاریخی کامیابی پر ایف پی سی سی آئی نے وزیراعظم اور فیلڈ مارشل کو “نوبل امن انعام” دینے کا مطالبہ کرتے ہوئے انہیں اس اعزاز کے لیے نامزد کیا ہے۔

ثاقب فیاض مگوں نے بزنس کمیونٹی پر زور دیا کہ وہ مشرقِ وسطیٰ اور دیگر ممالک میں کی گئی اپنی سرمایہ کاری پاکستان واپس لائیں تاکہ ملکی معیشت کو استحکام ملے۔ انہوں نے انکشاف کیا کہ اس معاہدے سے ایران پر پابندیاں ختم ہونے کی راہ ہموار ہوگی، جس سے پاک ایران گیس پائپ لائن منصوبہ مکمل ہوگا اور پاکستان پیٹرو کیمیکل کے شعبے میں ایران کے ساتھ بڑے پیمانے پر تجارت کر سکے گا۔ انہوں نے بتایا کہ خطے میں کشیدگی کے باعث پاکستان میں ٹرانزشپمنٹ میں اضافہ ہوا ہے اور تقریباً 14 سے 15 ہزار کنٹینرز کی آمد سے معیشت کے لیے نئے دروازے کھل گئے ہیں۔

اس موقع پر آرگنائزر معظم رشید نے بتایا کہ 23 سے 25 اپریل تک لاہور ایکسپو سینٹر میں 12ویں پاکستان کوٹنگ ایکسپو منعقد ہوگی۔ اس عالمی نمائش میں 80 چینی کمپنیوں سمیت 300 سے زائد چینی مندوبین شرکت کریں گے، جبکہ مقامی و بین الاقوامی کمپنیوں کے 250 اسٹالز لگائے جائیں گے۔ ثاقب فیاض مگوں نے مزید کہا کہ کیمیکل سیکٹر سے 15 لاکھ افراد وابستہ ہیں اور یہ ایکسپو خام مال کی صنعت اور ملکی برآمدات کو فروغ دینے میں کلیدی کردار ادا کرے گی۔