ہمارے پاس وقت ختم ہوچکا ہے‘، 20 سالہ خاتون پائلٹ کی ائیر ٹریفک کنٹرول کو ’مے ڈے کال‘ وائرل

امریکی ریاست فلوریڈا میں گر کر تباہ ہونے والے لیرجیٹ 60 (Learjet 60) طیارے کی 20 سالہ کو پائلٹ نتھالیا فیلگیراس (Nathalia Filgueiras) کی ایئر ٹریفک کنٹرول کے ساتھ آخری انتہائی خوفناک اور جذباتی گفتگو کا آڈیو وائرل ہو گیا ہے، جس میں وہ موت سامنے دیکھتے ہوئے بھی فرض نبھاتی نظر آئیں۔

یکم نومبر کو آسٹن، ٹیکساس سے بہاماس جانے والا نجی طیارہ فلوریڈا کی فضا میں شدید طوفان اور برفباری (Icing) کی زد میں آ گیا تھا۔ بلیک باکس ریکارڈنگ کے مطابق، شدید دباؤ میں طیارے کا پچھلا حصہ ٹوٹنے سے جہاز عمودی رخ میں نیچے گرنے لگا۔ نتھالیا نے 22 ہزار فٹ فی منٹ کی تیز رفتار سے گرتے طیارے کے دوران ایئر ٹریفک کنٹرول کو مے ڈے (Mayday) کال دیتے ہوئے صورتحال سے آگاہ کیا اور ان کے آخری الفاظ تھے: “باہر دیکھو! باہر دیکھو! ہمارے پاس وقت ختم ہو چکا ہے”، جس کے فوراً بعد چیخ کی آواز کے ساتھ رابطہ منقطع ہو گیا۔

اس دردناک حادثے میں کو پائلٹ نتھالیا اور کپتان سمیت طیارے میں سوار تمام 9 افراد ہلاک ہو گئے۔ ہوابازی کے ماہرین اور سوشل میڈیا صارفین شدید خوف اور اضطراب کے عالم میں بھی آخری سیکنڈ تک کنٹرولرز کو اہم ڈیٹا فراہم کرنے اور پیشہ ورانہ بہادری کا مظاہرہ کرنے پر 20 سالہ کو پائلٹ نتھالیا کو خراجِ تحسین پیش کر رہے ہیں۔