کرپشن سےمتعلق بیان پرقائم ہوں،وزیراعلیٰ پنجاب کا لیگل نوٹس ملاتو بھرپور جواب دوں گا: چوہدری سالک

اسلام آباد میں پارلیمنٹ ہاؤس کے باہر ذرائع ابلاغ سے گفتگو کرتے ہوئے وفاقی وزیر چوہدری سالک حسین نے پنجاب میں کرپشن سے متعلق اپنے حالیہ بیان کا اعادہ کرتے ہوئے کہا ہے کہ وہ اپنے موقف پر سختی سے قائم ہیں۔

وفاقی وزیر نے میڈیا نمائندگان کو بتایا کہ انہیں فی الحال وزیراعلیٰ پنجاب مریم نواز کی جانب سے کوئی لیگل نوٹس موصول نہیں ہوا، تاہم نوٹس ملنے کی صورت میں اس کا بھرپور اور قانون کے مطابق جواب دیا جائے گا۔ چوہدری سالک حسین نے مزید دعویٰ کیا کہ محض دو دن قبل خود وزیراعلیٰ پنجاب بھی صوبے میں کرپشن کی موجودگی کا اعتراف کر چکی ہیں۔

واضح رہے کہ گزشتہ روز وزیراعلیٰ پنجاب مریم نواز نے چوہدری سالک کے الزامات پر سخت ردعمل دیتے ہوئے انہیں قانونی نوٹس بھیجنے اور عدالت لے جانے کا اعلان کیا تھا۔ مریم نواز نے موقف اختیار کیا تھا کہ اگر حکومت اتنی ہی کرپٹ ہے تو چوہدری سالک کابینہ کا حصہ بن کر کیوں بیٹھے ہیں۔ انہوں نے مزید کہا کہ پنجاب میں افسران کی تعیناتیاں مکمل طور پر میرٹ پر کی جا رہی ہیں اور سفارش پر آنے والے عناصر پر کسی قسم کی رعایت نہیں برتی جاتی۔