یہ سسٹم جب سے آیا ہے اس کی پہلی اینٹ ہی ٹیڑھی ہے: علامہ ناصر عباس

سینیٹ میں اپوزیشن لیڈر علامہ راجہ ناصر عباس نے موجودہ حکومت اور حکومتی نظام پر سخت تنقید کرتے ہوئے کہا ہے کہ موجودہ سیاسی و حکومتی سسٹم کی بنیاد اور پہلی اینٹ ہی ٹیڑھی رکھی گئی ہے۔

ایک بیان میں انہوں نے کہا کہ خیبر پختونخوا میں ایمرجنسی جیسی صورتحال پیدا کر کے عوام کے واضح مینڈیٹ کو تسلیم کرنے سے انکار کیا گیا ہے۔ انہوں نے مزید بتایا کہ اپوزیشن کی کل جماعتی کانفرنس (APC) کی حتمی تاریخ کا فیصلہ ایک خصوصی کمیٹی کی مشاورت کے بعد ہوگا، جس میں کامران مرتضیٰ، ناصر شیرازی، سلمان اکرم راجا، عامر ڈوگر اور مصطفیٰ نواز کھوکھر شامل ہیں، جبکہ اخوانزادہ حسین یوسفزئی اور خالد یوسف چوہدری کوارڈینیٹرز کی ذمہ داری نبھائیں گے۔ علامہ راجہ ناصر عباس نے بانی پی ٹی آئی کی صحت پر شدید تشویش ظاہر کرتے ہوئے کہا کہ ان کا بلڈ پریشر مسلسل غیر متوازن ہے اور حکومت نے تمام ریڈ لائنز عبور کر لی ہیں۔

دوسری جانب قومی اسمبلی میں اپوزیشن لیڈر محمود خان اچکزئی نے زور دیا کہ تمام ملکی پالیسیاں پارلیمنٹ ہی سے ترتیب دی جانی چاہئیں۔ پی ٹی آئی رہنما سلمان اکرم راجا نے بانی پی ٹی آئی کی صحت پر تحفظات کا اظہار کرتے ہوئے کہا کہ صورتحال تشویشناک ہے۔ انہوں نے اعلان کیا کہ مجوزہ اے پی سی آئین و قانون کی بالادستی کے لیے قومی اتفاقِ رائے کی جانب پہلا اہم قدم ہوگی جہاں پی ٹی آئی، جے یو آئی اور ملک بھر کی دیگر سیاسی قوتیں ایک پلیٹ فارم پر آئندہ کا لائحہ عمل طے کریں گی۔